ab_libey_kiregie_zimneyo_ellal_zikri_part

ዝኸበርኩም አሕዋት ኣሓት ተኸታተልቲ ደሃይ ኣርካናት፡ እቶም ኣብ ትሕቲ ጎዳጉድን ሸላታትን ዓመታት ዘሕለፉ ጀጋኑ እሱራትና ብዛዕባ እተን ሰንደቕ ሓበን ኣዴታት ኤርትራ ተገዲሶም እዮም ሓቲቶሙኒ። ማዕሪኡ ከኣ ፍሉይ መልእኽትን ሓለፋ ዘለዎ ናፍቖቶምን ከብጽሓሎም ሓቲቶሙኒ።

እቶም ብጾት፡-

" ኣዴታትና ኣዴታት ሰውራ፡ ኣዴታትና ኣዴታት ፍቕርን ክብርንከ ከመይ ኣለዋ። ተራን ኣበርክቶን ኣዴታት ኤርትራ ኣብ እዋን ቃልስን ድሕሪኡን ኣብ ዝኽርና መዘና የብሉን። እተን ትንፋሰን ዓሚኸን ካብን ናብን ደጀንን ሕምብርቲ ጸላኢን ኣብ ቁነአን ኮነ ቅናተን ተበላሒተን ኣዚዩ ኣገዳሲ ምስጢራዊ መልእኽትን ሰነድን ዘመላልሳልና ዝነበራ፡ ምሉእ ለይቲ አዒንተን ሰለም ከየበላ፡ ጥሒነን ሰንኪተን ዝዓንገላና፡ ቁስልና ሓኪመን ክዳውንትና ሓጺበን ሞራል ኣስኒቐን ዘቃለሳና ኣዴታትና ከመይ ኣለዋ። መንብሮአን ከመይ ኣሎ፧" ክብሉ ተገዲሶም ሓቲቶሙኒ።

ዋላኳ እቲ ኣብ ቃልዕን ኣብ ናጻ ቤት ፍርድን ብሓቅታት ክገጥመና ዘይከኣለ መላኺ ንሰላማዊ ሕቶና ብሓይሊ ዓፊኑ ብምቕያድ ጸለሎ ቀቢኡ ከሰይጥነና እንተፈተነ ኣዴታትና ውሑዳት ዝደናገራ ገዲፍካ ሓቅን ሓሶትን ምፍላይ ኣየጸግመንን እዩ። በትሪ ሓቅስ ትቐጥን እምበር ኣይትስበርን ስለዝኾነ መላኺና ብጣቓ ሓሶታቱ ክኽወል ስለዘይከኣለ ምስ ግዜ ተቐሊዑን ተቓሊዑን እዩ። " ኣዴታትና እውን ስለምንታይ ኣብ ቤት ፍርዲ ቀሪቦም ጉዳዮም ዘይስማዕ!" ከምዝብላ ንርዳእ ኢና። እቲ መምስ ዘቕርበአንን ኣብ በቤተንን ዝብለኦ ፍትሓዊ ዘረባ ሓይሊ ኮይኑ ንግዳም ክወጽእ'ሞ ንስርዓተ ምልኪ ዓቕሉ ከጻጽብበሉ ዝያዳ ክደፍኣሉ ንጽውዕ።

ኣዴታትና፡ ኣሓትናን ኣሕዋትናን ወትሩ ምስ ውጹዕን ሓቀኛን ከምዝውግና ኢና ንኣምን። ታሪኸን - ታሪኽ ቃልሰን ከምኡ እዩ። ስለዚ ኣብ ርእሲ እቲ ፍትሒ ንኽንረክብ ናብ እዝግን ፈጣርን ዘብጽሐኦ ጸሎትን ምህለላን ነቲ ካብ ኩምራ ሓሶቱ ክቕላዕ ኣብ ደበንገረ ሓሶት ተሓቢኡ ሃገር ዝርምስ ዘሎ ከይሲ፡ ድምጸን ክብ ኣቢለን ኪገጥመኦን ክብድሀኦን ትጽቢት ኣሎና። ትጽቢትና ኣብጽሕልና ኢሎምኒ ኣርካናት ሃገር።

ኣደ ኤርትራ፡ ሰንደቕ ክብርን ሓበንን ምዃና ን30 ዓመታት ኣብ ዝተኻየደ ብረታዊ ቃልሲ ብጸላእትና ከይተረፈ ተመስኪሩለን እዩ። ኣብዚ ቐረባ ግዜ ግን፡ ኣዴታት ኤርትራ፡ ኣብ ልዕሊ ሬሳታት ላምፔዱዛ፡ ክስዕስዓ ቐንየን ምስ ሰማዕናስ ደንጽዩና ክንኣምን ኣይከኣልናን።

እዘን ሓበን ሃገር ኣዴታት ኤርትራ፡ ኣብዚ ነውሪ እዚ ውዒለን ክንሰምዕ ልዕሊ መርድእ ሞት እዩ። እዛ ኣብ ዓለሙ ብርህራሀን ልውሃትን እትልለ ኣደ፡ እትረፍ ኣብ ልዕሊ ሬሳ ደቃ ኣብ ልዕሊ ሬሳ ጸላእቲ እኳ ጓይላ ዘይወርደላ ለዋህ ኣደ፡ እሞ ኸኣ እታ እንሕበነላ ኣዴና - እንሕበነለን ኣዴታትና ኣብዚ ክፋእ ውዒለን ክብሉና ሓዚንና እና እሞ ሓደራኽን መጸባብቒ ውራይን ፌስቲቫላት ጓይላ ህግደፍ ካብ ሙዃን ኢድክን ኣክባ።

ክቡራት ኣዴታትን ኣሓትን ጸገምን መንግስትን ሓላፊ እዩ። ዘይሓልፍን ዘይበርስን እቲ ብቃልስኽን ዘረጋገጽክነኦ ብጽንዓትን ዘመስከርክነኦ ጀግነንት እዩ እሞ ሓደራ ነቲ ክብሪ እቲ ኣይተራኽሰኦ። እዚ ስርዓት እዚ ብኹሉ ምሉ ከየዕንወና ባህላዊ ክብርታትክን ዓቅባ።" በልልና ክብሉ ተላብዮሙኒ ምሒር እናስተንተኑ። ስለዚ ሓደራ ኣዴታት እዚ መልእኽቲ እዚ መልእኽቲ ደቅኽን፡ መልእኽቲ ሰብኡትክን፡ መልእኽቲ አሕዋትክን እዩ'ሞ ተገዲስክን ስምዐኦን ተግብረኦን።

እቶም ብጾት ንካህናትን መሻይኽን ንመራሕቲ ሃይማኖትን ኣገልገልትን እውን መልእኽቲ ኣለዎም። " መራሕቲ ሃይማኖትና'ኸ ከመይ ኣለዉ - ብዛዕባና እንታይ ይብሉን እንታይ ይሓስቡን ኣለዉ፧" ክብሉ ተወኪሶሙኒስ፡ ቅድሚ መልሲ ምሃበይ፡ ከምዚ ክብሉ መልእኽቶም ቀጺሎም።

" መራሕቲ ሃይማኖትና ኣቕሽሽትን መሻይኽን ጓሶት መንፈስን እምነትን እኹም እሞ፡ ሓደራ ንህዝብኹም ብመንፈስን እምነትን ጓስዩዎ። ኣብ ጽንኩር እዋን ጸግዕን ተስፋን እትኾኑ ንስኻትኩም መራሕቲ ሃይማኖት ኢኹም እሞ በቲ ፈጣሪ ዝሃበኩም ልቦናን በቲ ሃይማኖት ዘሰክመኩም ሕልናን ነውሪ ክትርእዩን ክትዕዘቡ እንከለኹም ዓገብ በሉ ሓደራ። ኣብ ቅዳሰኹም ኣብ ዶዓኹም፡ "ምእንቲ እሱራትና እናበልኩም!" ብጸሎት ከምእትዝክሩና ንፈልጥ ኢና። ፈጣሪ ጸሎትኩምን ምህለላኹምን ይስማዕ። ኩላትኩም ካህናትን መሻይኽን፡ ህዝብኹም ኣጋጢሙዎ ዘሎ ኣደራዕን መከራን ብቐረባ ስለእትፈልጡዎ ንባዕላትኩም እውን ግዳይ እቲ ምልኪ ዘስዓቦ ሕሰም ኬንኩም ብምህላውኩም ኪኖ ህዝቢ ምጽንናዕ ኣንጻር ዓመጽን ግህሰትን ህዝቢ ከተተሓባብሩ ሓላፍነት ከምዘለኩም ክትዝክሩ ይግባእ።

" ብዘይ ፍትሒ ንእተሸርቡ ደቅኹምን አሕዋትኩምን ኣሓትኩምን፡ ብዘይ ንቡር መስርሕ ፍርዲ ንልዕሊ 20 ዓመታት ኣብ ፈቐድኡ በረኻታት ሃገር ኣብ ሸላታት ተቐይዶም ንዘለዉ ዜጋታትኩም ፍትሒ ክረኽቡ ሞጉትሎም። ድምጺ ኩኑዎም ድምጺ ኩኑና። ኣብዚ ቐረባ ግዜ ካህናት ካቶሊካዊት ቤተክርስትያን " ሓውኻ ኣበይ ኣሎ - ሓፍትኻ ኣበይ ኣላ - ሃገርናኸ ብዓባያ ከመይ ኣላ!" ክብሉ ንዝመሓላለፉዎ ሃዋርያዊ መልእኽቲ ብኣኽብሮት ሰሚዕናዮ ኢና'ሞ ሓደራ መራሕቲ ሃይማኖትና ሓቢርኩም ደሃይ ህዝብኹም ክትገብሩ፡ ብኹነታት እቶም ኣብ ባሕርን ሰሃራን ዝጠፍኡ ዘለዉ ዜጋታትኩም፡ ኣብ ሲናይ ብሸፋቱ ዝሳቐዩ ዝደምዩ፡ ናውቲ ኣካላቶም ዝሽየጥ ዝልወጥ ዘሎ መንእሰይኩም ደሃይ ክትገብሩ ንምሕጸነኩም። " ስለዚ ሓደራ ኣብ ጸሎትኩም ኣብ ምህለላኹም ኣብ ቅዳሴኹም ዶዓኹም ምእንቲ እተን ኣብ ፈቐዶ በረኻታት ዝጠፍኣ ዘለዋ ነፍሳትን ደሃይ እዛ ዘይምሱል ዝመሰለት ሃገርኩም ግበሩ።" በልልና ክብሉ ተላብዮና ኣለዉ እሞ ሓደራኹም መራሕቲ ሃይማኖትና ብመንፈስን ግብርን ምርሑና።

ኣርካናት እሱራትና፡ ሕቶኦም ብምቕጻል መንእሰያትናኸ ከመይ ኣለዉ ኢሎም ምስሓተቱ፡ " ብዛዕባ መንእሰያትናስ ባዕለይ'ዶ ክዛረብ!" ብምባል ሃለዋት መንእሰያት ክነግሮም ከፍቅዱለይ ሓቲተዮምስ ስለዝፈቐዱለይ ከምዚ ክብል ርእይቶይ ኣቕሪበሎም።

"ሞተረ ሃገር መንእሰያትና ኣይጠዓሞምን ዘሎ። ሕድሪ ቀዳሞት ክትግብሩ ሓላፍነት ክስከሙ ዝግበኦም ንሳቶም እዮም ነይሮም፤ ግን ናይ ግዜ ገደብ ኣብዘይብሉ ግድድ ባርነት ተቖሪኖም ገላዩ ምልኪ ኮይኖም ኣለው።ተማሂሮም ኣብ ዝብጻሕ ከይበጽሑ ኩሉ መገድታት ተዓጽዩም፡ ተመርዕዮም ተደርዕዮም ወሊዶም ከይዝምዱ፡ ብደቆም ከይከብዱ ዕድል ኣይተዋህቦምን። መጻኢኦም ከይሰርዑ፡ ዝወለዱዎም ከየዕብዩ፡ ዘዕበዩዎም ከየምህሩ፡ ዕረፍቲ ብዘይህብ መንግስታዊ መደባት ማእቶት፡ ብዘይ ደሞዝን ዓስብን ኣብ መሳርዕ ዕስክርና ተጸሚዶም ኣለዉ። ጭንቀት ብዘስዓቦ ምኽንያት ከኣ ኣደዳ ስኽራንን ንሱ ብዘስዕቦ ስሕታን ግዳይ ሕማማት መውስቦን ፌጋቶን ኮይኖም ይሳቐዩ ኣለዉ።

ብምሒር ሕሰምን ምረትን ምስ ሓለፍቶም ተጋጭዮም ኣብ ዘይውዱቕ ዝወደቑን፡ ኮብሊልኩም ሓኪልኩም ተባሂሎም ኣብ ፈቐድኡ ሰናጭሮን ጎዳጉድን ተቐይዶም ዘለዉ መንእሰያት ውሑዳት ኣይኮኑን። እቶም ሃገሮም መሪራቶም እግሮም ብዝመርሖም ዝነፈጹ ከኣ ካብ ዶባት ሃገሮም ጀሚርካ ኣብ ዘዝኸድዎ ብቐስቲ ምልክን ስደትን ይሃደኑ ኣለዉ። ኣብ ሰሃራን ባሕርን ሲናይን ዘጋጥሞ ዘሎ ህልቅትን ጥፍኣትን መንእሰያትና ቀለም ባሕርን ብራና ሰማይን ዘይኣኽሎ ኣዘንቲኻ ዝውዳእ ኣይኮነን። ብሓፈሽኡ መንእሰያትና ኣይጠዓሞምን ዘሎ። ኩሎም እቶም ስልጣን ሒዞም ዘለዉ ብጾትናን መዘናታትኩም ከኣ ብቐንዲ እቲ ካብ ንቡር መስመር ወጺኡ ብምልኪ ዝመርሕን ዘመሓድርን ዘሎ ሰብኣይ በምዑት ደቆም ይጻወቱ ከምዘለዉ ኣይርድኦምን ዘሎ። ይኹን እምበር፡ እቶም ንርሁው መጻኢኦም ኣብ ውሽጢ ሃገሮም ክወዳደቡ ዕድል ዘይረኸቡ መንእሰያትና፡ ኣብ ግዳም ኣብ ስደት ምስ ወጽኡ ንኹሉ እቲ ዘጋጥሞም ናይ ስደት ብደሆታት መኪቶም ክጠራነፉን ክወዳደቡን ጀሚሮም ኣለው።" ምስበልኩዎም፡ ክቕጽል እናሓሰብኩ፡ ኣትዮሞ ካብ ዝጸንሑ ዓሚቝ ሓሳባት ተበራቢሮም፡ ዘረባይ ንኽቕጽል ብተስፋ ጠሚቲሙኒ።

" ይኹን እምበር.." ኢለ ገምጋመይን ዘሎኒ ሓበሬታን ከካፍሎም ዘረባይ ክቕጽል እናሓሰብኩ፡ ናይ ልበይ ግዲ ተረዲኦም ኮይኖም፡ " ክሳብ ሕጂ እዛ ብስራት እዚኣ እትነግርና እዛ ሃገር እንታይ ክትከውን እያ ዝብል ሻቖሎት ነይሩና እዩ። ይኹን እምበር ሃገርን ህዝብና ይደኽሙ እምበር ኣይጠፍኡን እዮም። ዋላ እውን ኣሎ ብዝበሃል መሳርሒ ህዝቢ ከተጽንት እንተፈተንካ ህዝቢ ኣይጸንትን እዩ። ስለዝኾነ ሃገርና ተስፋ ኣለዋ። ስለዚ ሓደራ ነዞም ካብ መሬቶም ርሒቖም ዝወዳደቡ ዘለዉ መንእሰያትና፡ እቲ ንሕና ኣብ እዋን ቃልሲ ዝፈጸምናዮ፡ ደድሕሬና እናሰዓበ ዘሳቕየና ዘሎ ጌጋታት ከይፍጽሙ ሓደራ በልልና። ዕድመ፡ ንጽቡቕ ኮነ ንሕማቕ ናይ ገዛእ ርእሱ ድፍኢት ስለዝህልዎ ምኽርን ምዕዶን ዓበይቲ አሕዋቶም ተቐቢሎም ሃድሕዶም ክከባበሩን ተሓባቢሮም ክሰርሑን ሕድርኹም ሕድሪ ጎረሮኹም ኢሎምኹም በልልና። ኢሎምኒ ኣለዉ እሞ መልእኽቶም ተቐበሉ።

መልእኽቶም ናብ ነፍሲ ወከፍ ቀጸላ ሕብረተሰብና ስለዝኾነ ነዊሕን ሰፊሕን እዩ። መቐጸልትኡ ኣብ ዝመጽእ ከስዕበልኩም እዩ።

ብጸይትኹም ጓል ደንደን!!

18 September 2014