መበል 60 ዓመት ዝኽሪ ባሕቲ መስከረም 1961፡ ምጅማር ብረታዊ ሓርነታዊ ቃልሲ ህዝቢ ኤርትራ።

መበል 60 ዓመት ዝኽሪ ባሕቲ መስከረም 1961፡ ምጅማር ብረታዊ ሓርነታዊ ቃልሲ ህዝቢ ኤርትራ።
الذكرى الستون لبداية النضال من أجل التحرر المسلح للشعوب الإريترية ، 1 سبتمبر 1961.
60th Anniversary of the Start of Eritrean peoples Armed liberation struggle, 1st September 1961.
1961 - 2021

እታ ሓበንን ትእምርቲ ጽንዓትን ህዝቢ ኤርትራ ዝኾነት፡ ፈላሚት ዕለት ብረታዊ ተጋድሎ ህዝቢ ኤርትራ እምበኣር፡ እነሆ 60 ዓመታ ኣእኪላ ደበኽ ኢላትና ኣላ።

እቶም ኣብዛ ንህዝቢ ኤርትራ ናጽነትን ሓርነትን ንምጉንጻፍ፡ በጃ ክሓልፉ ዝተወፈዩ ሓርበኛታትና፡ ብመሪሕነት ጅግና ሓርበኛ ሓምድ እድሪስ ዓዋተ፡ ኣብ ባሕቲ መስከረም 1961፡ እታ ፈላሚት ጥይት ኣብ ጎቦ ኣዳል (ባርካ) ኣበሲሮም። እቶም ኣዝዮም ውሑዳት ጀጋኑ ሓርበኛታት፡ ብኣዝዩ ድሑርን ውሑድን ዓቕሚ ብረት ብረታዊ ተጋድሎ ከልዕሉ ከለዉ፡ እንትርፎ ብጾቶምን ህዝቦምን፡ ኣብ ካልእ እምንቶ ኣይነበረን። ኮነ ኸኣ፡ ህዝቢ ኤርትራ፡ ካብ ጻት ንጻት፡ ካብ ራስ-ቃሳር ክሳብ ራስ ዱሜራ፡ ናብ ሰውራኡ ውሒዙ፡ ንሳላሳ ዓመታት፡ በጃ ህዝቡን በጃ`ታ ሓላል መሬቱን ብጅግንንተት ተጋዲሉ፡ ተሰዊኡ። ድሕሪ`ቲ መሪርን ሓጎጽጎጽን ዝመልኦ ጉዕዞ ሰውራና ሰጊሩ፡ ኣብ 24 ግንቦት 1991 ልዑላውነት ሃገሩ ኣረጋጊጹ።

ዮሃና! ነቶም ክወግሕ ምዃኑ ከይተጣርራጠሩ፡ በጃ ዝሓለፉልና ጀጋኑ።

ባሕቲ መስከረም፡ ልዕሊ`ተን ኩለን ሃገራዊ በዓላትና ኢያ። ንሳ ዝወለደታ ኸኣ፡ መዓልቲ ናጽነትና ኢያ። ናይ ባሕቲ መስከረም 1961 ገድሊ ህዝቢ ኤርትራ ዕላማ ግን፡ መሬትን ህዝቢን ኤርትራ፡ ሓራ ንምግባር ኢዩ ዝነበረ። ልዑላውነት ሃገር ተዓዊትናሉ፡ ሓርነት ህዝብና ግን፡ ገና ንምርግጋጹ ኣብ ዳግማይ ቃልሲ ንርከብ ኣሎና። በዚ ምኽንያት`ዚ ኸኣ፡ ባሕቲ መስከረም፡ ሓርነታዊ ጉዕዞኣ ክትቅጽል ግድን ኮይኑ ይርከብ።

እወ፡ እዛ ወርሒ ዚኣ፡ ኣብ 1961 ባና ናይ ሓርነታዊ ቃልሲ ሽግ ዘልዓልናላ ክብርቲ ዕለት ኢያ ነይራ። ወርሒ መስከረም ኣብዛ ሓዳስ ኤርትራ ግን፡ ዲክታቶሪያዊ ምልኪ ዝሰወደላን፡ እቶም ሙሉእ ህይወቶም ምእንቲ ህዝቦም ዝተቓለሱ ሓርበኛታትን ሃገራዊያንን፡ ከምኡ`ውን ጋዜጠኛታትን ናይ ሃይማኖት ኣመንቲን፡ ኣብ ሃለዋቱ ዘይፍለጥ ማሕዩር ዝተሰወሩላ ወርሒ ኮይና ኣላ። እቶም ኣብዘን ዝሓለፋ 30 ናይ ድሕሪ ናጽነት ኤርትራ ዓመታት፡ ደሃዮምን ሃለዋቶምን ዘይፍለጥ ሃገራዊያን፡ ሎሚ ዶ ጽባሕ መስተርሆት ይመጽኣና ይኸውን እናበሉ፡ በቲ ዘይስማዕ፡ ግን ከኣ ሓያል ዝኾነ ሃንቀውታ፡ ይጽበዩና ከምዘለዉ፡ ኩልና ንስሕቶ ኣይመስለናን። በዚ ምኽንያት`ዚ ኸኣ፡ ኩልና ሃገራዊያን፡ ነታ ባሕቲ መስከረም ዘሰከመትና ሕድሪ፡ ናብ መፈጸምታኣ፡ ማለት ናብቲ ርሁውን ሓራን ዝኾነ መድርኽ ከነብጽሓ፡ ብታሪኽ ንሕተት ኣሎና። ከም ትማሊ ንናጽነትና፡ ሎሚ`ውን ምእንቲ ሓርነትን ልዑላውነትን ህዝብና፡ እቲ ኩሉ ዝከኣል ዘበለ መስዋእቲ ክንከፍል፡ ሕልናና ክወቕሰና ይግባእ። ነቲ ናይ እዋን ገድሊ `ኣነ ክስዋእ ንስኻ ጽናሕ` ዝብል ክቡር ባህልና፡ ሎሚ`ውን ክንደግሞ ይግባኣና። ሃገርና፡ ናብ ንቡር ህይወት ኣብጺሕና፡ ከም ዓለማ ክትመስል፡ ካባና ዝጥለብ ዘበለ፡ በብዓቕምናን ሞያናን፡ ክንስለፍ ኣሎና።

ኣብ ብዙሕ ክንፈላለ ንኽእል ንኸውን፡ ኣብ ሃገራዊ ፍቕርናን፡ ልዑላውነት ሃገርናን ህዝብናን ግን፡ ከም ኤርትራውያን፡ ኣይንፈላለን ኢና። እሞ፡ ኣብዛ ክብርቲ ዕለት ባሕቲ መስከረም እዚኣ፡ ነቲ ኣብ ቃልሲ ዘመስከርናዮ ሓድነት፡ መሊስና ንምትራሩ፡ መብጽዓ እንኣትወላን፡ ሓርነታዊ ቃልስና ንምሕያል፡ ብግብሪ እንውፈየላን ኣጋጣሚ ጌርና ክንጥቀመላ ይግባእ።

ክብርን ምስጋናን ነቶም ሓርነታዊ ሰውራ ዘበገሱን፡ ብጅግንነት ዝሓለፉን ሓርበኛታት ወለድና፡ ይኹን!

መርበብ ሓበሬታ፡ ስኒትና.ኮም።

ካብዚ ብምቕጻል፡ መርበብ ሓበሬታ ስኒትና፡ ካብ ዝተፈላለዩ ምንጭታት ዝበጽሓናን፡ ዝረኸብናዮን ነዛ ዕለትን ወርሒን`ዚ ዝምልከት ጸብጻባት፡ መግለጺታትን ሓበሬታን፡ ኣብ ታሕቲ ከነስዕበልኩም ኢና። ነዚ ገጽ ዚ፡ በብእዋኑ ብትሕዝቶ ከነሀብትሞ ስለዝኾንና፡ ተማላሊስኩም ክትበጽሑዎ ድማ ንላቦ።

Erimedrek.org:
መበል 60 ዓመት ኢዮቤሊ ምጅማር ዕጥቃዊ ቃልሲ ህዝቢ ኤርትራ ኣብ 1961፡
ዕላል ምስ ገዲም ተጋዳላይ ተሓኤ`ን፣ ህግሓኤ`ን፡ እድሪስ ዑመር በሪራይ።
On the Occasion of 60th anniversary of Sep. 1st, discussion with Idris Omer Beriray, ELF and EPLF veteran.
-------

Part 1/4 (05 Mar 2021): Part 2/4 (11 May 2021): Part 3/4 (06 Jun 2021): Part 4/4 (12 Jun 2021):